Pantun Saluang
SUAYAN BALENGGEK
Galodo
*) Misramolai
Gampo galodo nanlah datang
Batamuan jo gunuang tigo
Pambaleh jaso rang nan ilang
Siang-siangi pusaronyo
oi ragu den di nyo den dinyo
Abih lah parik jo malalak
Turun talago paladangan
Dek nan tingga tangih taisak
Lah data kampuang jo halaman
Kapalo koto turun ka kabun
Ratak sampai ka koto mambang
Abih bulan baganti taun
Alun ka taubek tangih di ranah minang
Ayah ilang mande takubua
Anak dicari tak basuo
Oi kok pulang sanak nan jauah
Lah tanah kuniang ka pusaro
Pakiak jo tangih padang piaman
Dusun jo nagari tabaok sato
Kama nasib ka dikadugan
Lah hilang sanak jo sudaro
PARIAMAN
TANGGUANG
Sajak
indak bainduak
*). Misramolai
Tangah malam tabiklah manuang
Samanjak indak den ba rang gaek
Baurang gaek lah o mande oi
Sajak saindak bamandeh kanduang
Nasi den mintak sumpah nan dapek
Sumpah nan dapek lah oi mandeh oi
Sajak indak badan bagaluak
Jo apo aia ka denai timbo
Ka denai timbo lah mak kandung oi
Oi Sajak baindak denai barinduak
Iduik sansaro salamo ko
Japuik den baliak lah I mandeh oi
Payak indak baniru laduang
Kamalah bareh kadikaka gan
Taresak juo malah jadinyo
Ooii, sajak saindak bamandeh kanduang
Oi, nasi rasan urang barigan
Nan dek litak tamakan juo
Ilang kapak ilanglah baji
Pangatam kayu di dalam rimbo
Di dalam rimbo lah oi mandeh oi
Oii, hilang Bapak dapek den ganti
Mandeh kok mati karam sadonyo
Karam sadonyo lah oi mandeh oi
Oi, mandeh janyo den mandeh
Kamandeh untuang denai sarahkan
Denai sarahkan lah oi mandeh oi
Oi, jaso mandeh balun tabaleh
Oi, anto denai mandeh tinggakan
Japuik den baliak mandeh kanduang
oi
PIAMAN
LAMO
Yo lai ooooi, ooooiiiii
Tampuruang sayaknyo tigo…. Ko da oiii……..
Ambiak ciek tingga nan paceh
Namonyo tampuruang juo
Kini tasisiah dari sabuik
Apo sabab orang sisiahkan
indak tantudoh karanonyo
Mungkin jo sabuik nyo batikai
Sajak uda babini duo
Kasiah tampak barek sabalah
Ibaraik jalan basimpang duo
Jalan nan ma lah nan kadituruik
Apo nan tuo baditinggakan
Jikok kataruih yo jo nan muda
Anak uda tambah marasai
Sawah rokan jo padang kudo
Badakek juo jo sawah rokan
Kabalainyo ka bukik tinggi
Disangko sanang babini duo
Sangaik susah mambagi badan
Uda baduto da kian kamari
Ooii lalai yooo, tuan oiii,, uda
baduto kian kamari aaaii ooi…..
Yo lai ooi, aaaooiiii……
Bukik tinggi bapasa banto….. ko da
oiii……
Dalam daerah tanah rang agam
Pintu di simpang tembok
Jam gadang ditapi jalan
Agam juo kabupatennyo
Kampuang gaduik bukik ambacang
Pacuan kudo sajak dulunyo…… oi
Kok nak tau jo untuang ambo
Caliaklah nasib induak ayam
Bia kapalo kanai contok
Darilah pungguang dipijak an
Baitu denai salamo ko
Nan kok anak den kasuah surang
Dek apak ayam tak bajaso da….. oooiiii….
Ooii lalai yooo, tuan oiii,, dek
apak ayam tak bajaso aaaii ooi…..
Lagu piaman lah diagiah
Basamo sanang mandanga gan
antoh duduak bamanuang juo da, aaaaiii
ooiii
Dek nan kanduang cubolah pikia
Sayang ka anak den kurangan
Dek uda iko kabaleh nyo
Ooii lalai yooo, tuan oiii,, dek
kanduang iko kabalehnyoi aaaii ooi…..
Yo lai ooi, aaaooiiii……
Batu sangka balantai batu….. ko da oiiii
Parak jua labuah basilang
Ari kamih raminyo pakan
Galanggang kudo bukik gombak
Sinan tasabuik pagaruyuang
Manurun kasaruaso
Disinan alek ulu balang
Alek banamo tigo luak
Kaja bakaja dalam rimbo
Disaruaso kampuang denai
Bagadang ati uda baburu
Samantang lupak sadang kancang
Baguluik gulik malapeh gan
Dek mancaliak buruan rancak
Lupak bak raso ka manggungguang
Lah bakaja sahabih tanago
Ampia katumbang babi gadang
Oi dek malang akuan lupak
Saketek indak awak manyangko
Samuik kampuang nan manyudahi
Ooii
lalai yooo, tuan oiii,, samuik kampuag nan manyudahi… aaaii ooi…..
Denai badendang tolong danga gan
Lah sanang ati tukang saluang
Ka paubek mato mangangtuak
Pado mambali anjiang jawa
Elok dibali anjiang kampuang
Kacaran panjang da kabangkai masuak
Ooii
lalai yooo, tuan oiii,, kajaran panjang kabangkai masuak… aaaii ooi…..
I malang laaaaai iiiiiii….. haa aiii..
aaaiii. Aaaiii
Tasabuik nagari guguak tinggi
kaduo nagari padang panjang
Sinan talatak simpang tigo
Kasuok ka pariangan
Padang panjang arah kabaruah
Banyak basawah tapi jalan
Masuak pariangan jo biaro
Disinan jalan tabantang
Sinan nan banyak oto ta tagak
Manunggu
urang pai kapakan
Sabanyak iko laki-laki daaaa… aaaa…. Aaaa….
Manga kakanduang hati den sayang
Kanduang lah jaleh ba nan punyo
Jo nan punyo denai bakawan
Patuiknyo denai indak namuah
Dek cinto kadipangagan
Nyampang kok indak namuah lupo
Tolonglah ganggam kasiah sayang
Lah tangguang denai kamailak
Bialah denai diduogan oooii aaaiii
aaaiaii….
Ooii lalai yooo, tuan oiii,, bialah denai diduogan… aaaii ooi…..
Iii malang laiiii …..ooooiii……. yooo
ooi oooi
oo oiiiii
Pisau tajam tangkai baukia
Untuak parauik sangkak balam
Den asah tajam ateh batu
Pisau satampek nan jo ladiang
Ladiang nan indak bari baulu
Kapak gadang sudah balampeh
Kini lah tajam katigonyo
Pisau mambuek sangkak buruang
Ladiang kaganti garagaji
Kapak kauntuang panabangan
Samo paguno katigonyo
Kini tapakai ladiang panjang
Kok iyo kito kabalai diak… oooiii oioiii
Usah takuik biduak ka karam
Sabab baalah dek baitu
Denai kan lai kamambimbiang
Baa bana angin baseru
Bia manggilo ombak ma apeh
Kok gadang bana badai nan tibo
Tangan suok pamangku kanduang
Tangan kida pamacik kamudi
Dek yakin ambo ka nan kuaso
Salamaik juo kasubarang diiiaaaak,…… oooi ooii lah tuan oooi….
Oo lalai yoooiii ooiii aaaa ooiii ooiii
iiiii…..
Tasabuik bana simpang ampek
Dalam daerah payokumbuah
Tanamo pulo simpang tigo
Arah kasuak batang tabik
Dakek sitabuah tanjuang aro
Disinan urang badendang
Hari Disinan hujan rinai
Maki lamo batambah labeh
Bataduah dirumpun aua
Kanai titiak badanlah basah
kironyo ujan sampai patang…. Ooo tuan
aaaiii…..
bamulo rumah kadenai buek, daaa…
dibali tanah di tapi labuah
rumah rancang potongan tibo
balantai ubin bakaramik
gaduang mewah batingkek pulo
lah sanang mato mamandang
tapi malang tibo di denai
tabali tanah indak basurek
izin bangunan indak kalua
pitih habih rumah tak sudah
awak kanaiak diambek urang aaaiii, oooi lah risau aaaaiii….
Ooii lalai yooo, tuan oiii,, awak kanaiak diambek urang… aaaii ooi…..
Ii… malang laiiiii, yoooiii ooiii aaaa
ooiii ooiii iiiii…..
Bansaik den ko raso kalamo
Padiah hiduik sananglah baa
Nak dapek denai nak baralek
Buliah rang kampuang manyilau den
Urang manolong lai namuah
Alek nan datang rami bana
Rami aleknyo sampai sanjo
Sado nan makan lah bi pai
Nan kapai barila rila
Tarimo kasih kasadonyo
Kok iyo denai nan cilako
Basuaklah jajak den nan tingga
Piliahi rimah den nan taserah
Sapu sarok puntuang rokok den
Tolong buangan jauah jauah
Bacolah Doa tulak bala
Tulak lah batin badan ambo
Pado batangka tiok ari
Labiah elok awak bapisah
Dek kanduang indak kapaguno…., diaaaak, iyo oooiiii
Ooii lalai yooo, diaaak oiii,, Dek kanduang indak kapaguno… aaaii
ooi…..
SINGGALANG
KUBU ATEH
*). Sawir sutan muda
Hari lah badarok malam
Singgalang namonyo gunuang
Lereangnyo bangarai ngarai
Dibukik tampek paladangan
Nan dikawan niaik lah lansuang
Diawak sadang tabangkalai
Aia mato batingadah gan
Gunuang singgalang jo marapi
Dibaliak kota padang panjang
Dipaga bukik bakuliliang
Tak guno untuang den sasali
Denailah nyato padi ladang
Biaso tumbuah dinan kariang
Oi Rang kampuang pai kabalai
Sinayan rami padang panjang
Oi Daerah sapuluh koto
Maratok madok kabangkalai
Dek mikin joa kadiulang
mungkin kayo kamanyudahkannyo
kabuik tibo gunuang tasaok
tandonyo ujan nan katurun
karimbun tanaman muda
kanduang siriah denai karakok
lai bana sarupo daun
tak mungkin samo kacarano
konon desa tabu baraia
panyalaian jo koto tuo
masuak daerah padang panjang
kanduang tadanga kabalaia
kami mancari biduak pulo
nak samo lansuang kasubarang
SIJOBANG
*). Sawir Sutan Mudo
Tuan ai juo janyo denai
Bamulo urang dek kaparang
Ari akaik pukuah duo baleh
Nan lah masuak urang ulando
Nan manembak di payokumbuah
Luko tantara tapi jalan
Dek malawan musuah nagara
Nan kok tuan usah tagamang
Nan kok kanduang usahlah cameh
Kok tak salasai doh disiko
Nan Baolah karantau jauah
Di rantau nikaik Dilansuangan
Nak pueh ati rang nan tingga
Kanduang oi juo janyo denai, nak
pueh ati rang nan tingga
Ari sanjo paranglah usai
Nan babaliak musuah katampek
Bisuak musuah dihadang pulo
Baitu niaik pahlawan
Kasiah lah lamo tabangkalai
Janjilah arek tapabuek
Kok lai dalam niaik juo
Pabilo juo kadisampaikan
Tuan ai juo janyo denai
Tuan
ai juo janyo denai
Takalo maso daulunyo
Bamulo japang dek kamasuak
Urang ulando nan nyo usia
Biang cabiak gantiang kaputuih
Tabujua lalu tabalintang patah
Tagah baliau salah niaik
Urang awak nyo aja kapia
Dek Tuhan indak maijinkan
Akianyo japang kalah juo
Pihak kadiri badan ambo
Oi basilang karih dirusuak
Nan bamain rencong dilihia
Dibalakang badia nan malatuih
Nan dimuko geren maningkah
Nan di ati lah bulek tekaik
Walau diseso parasaian
Kanduang kadenai bimbiang juo
Tuan ai juo janyo denai
Tuan ai juo janyo denai
Nan karimbo ka ladang jangan
Indak doh capo kadiguguik
Oi karimbo urang pitalah
Kamalah sariak dilampaikan
Kamalah kato dikatogan
Oi karimbo juo jadinyo
Tukang manarah kayu jati
Kayu ditarah untuak paran
Den kato alah badorongan
Kapa balaia pantang suruik
Tabujua lalu balintang patah
Tibo dimato dipiciangan
Tibo diparuik dikampih an
Di ati mati dimato buto
Baitu tekaik dalam ati
Antah kok kanduang takuik karam
Tuan ai juo janyo denai
CANCANG
KAMBIANG
Eiii Sitajuak parang jo lundi
Talang miang ditanah banto
Disangko Silasiah Jambi
Silasiah dulang
mah kironyo
Babujuak denai jo budi
Baindang denai jo baso
Disangko kasiah ka kami
Kasiah jo urang moh kironyo
Adiak den juo deh mak jannyo
Oi bungo malua kambang
sabatang
Di baliak pandan baduri
Dipipia dibagi duo
Baok ka parik kabalakang
Adiak denai Kok kurang
sanang
Cari dek adiak tampek hati
Denai tasisiah lah biaso
Nan bedo adiak tingga surang
Adiak den juo deh mak jannyo
Oi gaba gaba di dalam tanjuang
Bamerek salamaik datang
Gabanyo indak baganti lai
Babelok jalan ka tiagan
Saba juo kato nan kanduang
Lah bak raso kanai jilatang
Sakiknyo kajantuang hati
Padiah kasia den katokan
Adiak den juo deh mak jannyo
Ei Limo kaum batu
batikam
Batu sangka balantai batu
Parak jua labuah basilang
Babelok jalan ka rambahan
Kasiah putih sayang mandalam
Adiak dimalah nan katau
Baa lah diak ka parintang
Adiak nan indak talupokan
Adiak den juo deh mak jannyo
SINGGALANG MINTA
TABIA
Kama to kito pai oooi
Hari lah barembang patang
Nan dicabiak kain dibali
Nan dicabiak tangah do jangka
Tangah do jangka dunsanak oi
Mintak tabiak ambo manyanyi
Bakeh dunsanak na mandanga
Oi dunsanak tolong dangakan
Disusun jari nan sapuluh
Nan katangah salam takambang
Salam takambang oi dunsanak
Kaganti siriah nan sakapua
Kaganti rokok nan sabatang
Mintak maaf bakeh dunsanak
Karirawa na ai didalam rimbo
anak ruso mati tadabiah
Mati tadabiah nan kanduang oi
Nan kok gawa maafkan ambo
Nan kok salah ampunnan labiah
Ampunkan kami dek dunsanak
Walau kito dek urang badendeang
Indak lupo diri ka Tuhan
Oi ka Tuhan ndak buliah lupo
Nan kok salah ambo badendang
Dek dunsanak tolong maafkan
Maafkan malah badan ambo
Dicarano siriah dilatakkan
Ka panyambah niniak mamak
Niniak mamak lai jo bundo kanduang
Diambo mintak dimaafkan
Rela jo maaf kami mintak
Rela jo maaf kami mintak
Nan kok salah kami basaluang
Kayu sicerek ditapi banda
Babuah tolong runduakan
Tolong runduakan dek dunsanak
Kami kini baru baraja
Nan kok salah tolong tunjuakkan
Tunjuakkan dek dunsanak
Kota dek bukit nan ma ambek
Tampak disiko pamandangan
Namuah bana luko diubek
Bakeh joa diilangkan
Nan disawah tumbuahnyo jaguang
Diambiak sado nan muda
Ibo dek Adiak katasingguang
Kalek diakui manih juo
Kain banamo gondang gondang
Pamenan puti indopuro
Luko nan dulu alun sanang
Tampek jatuah lah tampak pulo
Kubang balah koto tinggi
Jalan gadang kamudiak simpang
Taluko ati dek nan kini
Mambayang elok urang nan ilang
Urang bungka pakan salasa
Ladang laweh bateh tangahnyo
Disangko lai indak kabaa
Kiro marusak ati juo
Kadai puncak sabana rami
Tampek bakumpua basamo samo
Kok dapek bana kapangganti
Indak dapek banyak janyo kito
PARIAMAN TANGGUANG
(Pulanglah Anak)
Yolai yo.....
Padiah bana luko tasaik
Alun sapadiah dek duri limau
Kajantuang ati marasonyo
Salamo badan jatuah sakik
Surang tak ado nan manyilau
Ulah dek bansaik nangko juo
Oi malang lai,
ulah dek bansaik nangko juo oo
Oi.. tarusan dikampuang mudiak
Simpang kapau jo guguak randah
Taruaihkan jalan bukiktinggi
Nyampang anak indak babaliak
Sakik ayah indak barubah
Tanah tasirah badapek i
Oi malang
aaiii, tanah tasirah badapek i
Yo lai yo......
Tuo sia lah nan kamambimbiang
Lai anak jauah dirantau
Dek ulah bansaik salamoko
Dipondok ayah tabariang
Lai bana urang manyilau
Tapi sahinggo janajang sajo
Nak kanduang oiii, tapi sainggo janjang sajo naak
Ka untuak badan dikurangkan
Baitu sayang bakeh
anak
Kok lai isuak mambaleh guno
Sadang sakik manangih badan
Kawan galak yo lai banyak
Kawan rusuah sarik basuo
Oiii anak oiiii,
kawan rusuah sarik basuo
Malang laiii....
Kamalah sakik dikatokan
Indak ado tampek batanyo
Lai rang rumah basiginyak
Niak anak ayah gadangan
Kapambimbiang ayah lah tuo
Kini larek karantau urang
Oiiii anak
oooi, karantau urang nak oiii
No comments:
Post a Comment